جنط 21 السياره مع المطبات متعبه وش الحل

فيه طريقه اسويها انا مع جنوط 19 داخل الديره اخليه 28 وبالخطوط 32 (( طبعا ذي الطريقه امنه اذا تحقق شرطين ))

الاول تشوف اقصى ضغط يتحمله الكفر عندك .. اللي عندي مكتوب Maximum pressure 51 Pascal

طبعا دام الهواء فيه 26.5 معناته تحقق الشرط الاول لان الكفر فيه 50% من الضغط (( انتبه بعض الكفرات مسجل عليها اقل ضغط واقصى ضغط .. يعني مب كلها تنقص الهواء للنص ))

الشي الثاني تأكد من تحمل الكفر وسرعه الكفر لازم يكون 98 فما فوق والسرعه y .. (( علشان تنقص الهواء على راحتك بس تسلم من التحبيل )) تحصل هالرمز مكتوب بعد المقاس مباشره واذا مافهمت اضغط على اسمي وشوف اول موضوع لاني شرحته بالتفصيييل

الصراحه يبو هيثم المنتدى بحاجة امثالك والرفاعي والمطلق وعدة اسماء استفاد الجميع منهم
انا من اليوم في هالشموس قاعد اقرا كفراتي وتحملها لقيتها كويسه.  مع اني برجستون
داخل المدينه ٣٠ وخارجها ٣٥ وجنطي ٢٢ فلك الشكر والدعوات

عبدالله الشفيعي وانت بعد من ضمنهم مالي شهور بالمنتدى بس لاحظت الناس الي فاهمه وتبي تخدم الناس بدون مقابل وعندها خبره واضحه
وماتبي من المنتدى غير انها تفيد وتستفيد الله يكثر من امثالكم بها المنتدى

في استكر في باب السائق بالعاده او باب الراكب او غطاؤ تانكي البنزين


موضح فيه مقاس الكفر والجنط وضغط الهواء المناسب


اذا بتغير الجنوط ركب احد المقاسات الموجوده في الاستكر وما راح تتاثر السياره لانها مواصفات مدروسه

إذا كانت سيارتك جنط 21 حاول تركب جنط 19 يعني فرق مقاسين

لاتغير جنط 21 بجنط 20 مافيه فرق

وأفضل شي أخوي تشوف الملصق الموجود على الباب ومقاسات الجنوط الممكن تركيبها وأهم شي تأخذ في الحسبان جنوط وكاله أو جنوط السياره التي تملكها أنت وليست جنوط سياره مختلفه ..

المغزى سيدي الفاضل هو ( كل ماصغر الجنط كان أفضل من الجنط الكبير ) هذا مجرد رأي لايعتد به فهو قابل للخطأ والصواب ..

اي جنط يكبر وتقل مساحه المطاط الي هو الكفر بيزيد المطب

واي جنط يصغر ويكبر الكفر بيصير ممتاز بالمطبات.

حتى بالبر الجنوط الكبيره ماتصلح بالعكس كل ما صغر الجنط وكبر الكفر صارت افضل بالبر.


طبعا هذا من ناحيه المطبات.

ولا تنسى الكفر اذا صار نحيف صار عرضه للتكريش او التحبيل ويخرب بسرعه من الطرق الجميله عندنا .

بل في بعض الاحيان يمكن ينكسر الجنط من بعض الحفر.

وكل سياره لها مقاسات لكل جنط يكون مسجل رسمي .